Сигимова Н. Г. ТИРИНЬ КЕЛЕСЬ – ЭРЬВА РАСЬКЕНТЬ ОЙМЕЗЭ.
ТИРИНЬ КЕЛЕСЬ – ЭРЬВА РАСЬКЕНТЬ ОЙМЕЗЭ.
Сигимова Н.Г., учитель родного (эрзянского) языка и
литературы МБОУ «Поселковская средняя школа №2»
Атяшевского муниципального района, п. Атяшево
Кие тон, ломань? Козонь чачить? Кить тонь раськеть, малавиксэть? Ломанесь ды шкась. Неть кавто валтнэ кеместэ сюлмазь эсь ютковаст. А стяко кортыть: ве таркасо иетне а аштить. Икелев молемаст пингстэ лиякстомтовить оштнэнь ды велетнень чачост, ломанень тевтне – арсематнеяк полавтневить. Модамасторонть лангсо эрямось лажны виев чадыведекс. Сонзэ эйс човорявсть полавтовомат вадрят и берянть. Неть полавтовкстнэнь азорось ломанесь, сонзэ вановтонзо эрямонть ды ютазенть лангс. Мезе сон сайсь лезэвенть ютазь пингестэнть ды кандсы седе тов эрямонзо перть?
Мель ёжо… Сон алкукскак певтеме. Стувтови весе а эрявикс берянесь ды кежесь, но кады ламо пингень перть сень, мезесь ловови питнеекс, мезенть свал эряви кирдемс эрямолувсонть: чачома ёнксонтеь, тиринь масторонтень вечкемась, лия раськетнень марто ояксчисэ эрямось, вейке вейкенень лездамось, вейкень – вейкень чарькодемась, раськенть ванстомась, кода башка этносонь вейсэндявкс, сонзэ коензэ – кирданзо, тиринь келензэ. Эдь эрьва раськенть тиринь келезэ – питневтеме казне, покш сюпавчи. Тиринь келесь – эрьва раськенть оймезэ, сонзэ свалшкань улемазо, эрямозо масторлангсо кода башка раське.
Кевейксэе иеть эрятано од пингесэнть. Эрьва иесь алтазь кодамо – бути эрямолувонь ёнксонтень. Те иестэнть минек тиринь ёнкссо ютавтови покштояк покш эрьгедема — VII Эрзя – мокшонь раськень съездэсь. Те весе тееви а стяко. Эрьва раськень ломанентень эряви путомс весе виензэ эсь ванстомантень, кода эсь раськень эйде ды марямс эсь прянть весе масторонть культуранзо пельксэкс.
Сеедьстэ марятано ды нетяно газетань лопатнень лангсто этнос валонть, кона ашти истят валтнэнь пельксэкс: этнокультура, этногруппа, этно ош, этно КВЕСТ… Зяро иляст уле валтнэде, весемесэ покш смусть канды сонсь валось, кодамо кельсэ сон ёвтазь. Секс монь кортамом карми улеме валдонть, кона вельде ломанентень пачтяви эрьва раськентень кандовомазо. Содазь, валось канды зярыя потмоёжонь смустть, кода грамматикань пелькс. Сонзэ оштё седеяк покш зэмезэ, кода раськень лиятнеде явовома. Валось — те сонсь келесь, кона ловови раськенть оймекс, эрямокс. Арсян, што ансяк келесь, ломанень потмо оймесь кандыть эрьва раськенть уликсчинзэ. Бути саемс лия раськень ломань, оршавтомс лангозонзо те эли тона раськень оршамопель, ёвтавтомс кедьстэнзэ те кельстэнть саезь валт, сон ялатеке а карми те раськень ломанекс. Сон ансяк пурны содамочить раськенть койдензэ – кирдадонзо. А мезть сёпомс: рузыямось пек кеме эскелькссэ юты. Тесэ пек ламо тувталтнэде. Нама, васняяк, те кудораськесэ тиринь кельсэ а кортамось. Бути уш арась кортамо эсь юткова тиринь кельсэ, ловт, зярыя ломанде минь аламолгадынек. Мон, кода човор раськестэ лисезь ломань, прям лован эрзянь. Сон монень седе малавикс. Рузонь келенть хоть кода кармат содамо, а вана айгсак удалов тириньсенть, ловт, тон миить покштянок – сырькаенек сюпав оймест, ламо пингень перть пурназь сюпавчист: келенть, койтнень – кирдатнень. Валось, кона кандозь пингеде – пингес - те питневтеме сюпавчи. Васняяк, те минек раськенть шкинемазо. А кодамо сон питнейдеяк питней!
Минек покш путовксось: ванстомс эсь тиринь келемек, илязо сон стя ёмамонь ки лангс, а сонзэ марто и весе пингень перть таштазесь. Седеем пек тень кисэ сюморды. Эряви а максомс мадстемс штатолонть эрзянь ды мокшонь раськень ломантнень оймесэ. Васняяк, эйдень. Эйкакшось, саи весементь, мезе неи, мари. Миненек сави «тюремс» неень шкане сеть кажов тевтнень каршо, кода: компьютерсэ налксемась, итернетсэ кувать аштемась, лезэвтеме шкань ютавтомась. Бути уш вишкапингстэ эйкакшось понги те кечказонтень, прок шанжавонь кодавксонтень, ловт парос а панжи. Од изнявкстнэ техникасонть, нама, те пек паро тевесь, бути сынст нолдамс эрямос, тонавтнемстэ маштозь, лезэ марто. Валдонть башка покш зэме налкси се таркаськак, кува эри, эрясь те эли тона раськесь. Те чачома таркась, тиринь ёнксось. Нама, куншкакуротне касыть – мазылгадыть, а вана ве ёно аштиця велетне ёмить, чамить. Те пек покш сэредькс. Кулось велесь – кулость мартонзо келеськак, койтне – кирдатнеяк.
Валось - кода раськенть тиринь келензэ уликсчинь невтема. Валось — те раськень ванстыця, эсь раськень эйдень триця — кастыця. Валось — те эрьва раськенть келензэ уликсчинь ёнкс, ломанень виенть ветицязо. Валось — келенть сюпавчизэ, мазычизэ. Эсь важодемасон покш мель яван тонавтницятнень кель-валост, кортамонь культураст касомасо – сюпалгавтомасо тевентень. Бажан невтемс валонть виензэ, питнейчинзэ. Ветян седе ламо содыцятненень кружокт: «Тиринь келень масторсо», «Налксемань» («Драматической»). Ламо тееви «Одарённые дети» проектэнть топавтомга. Аволь вейке ие ветяви «Толнэть» вейсэндявксось, козонь совить сеть эйкакштне, конатнень ули ёрокчист сёрмадомань тевсэнть. Тень коряс истя жо бажан ветямс эрявикс важодема. Эрявиксстэ, маштозь ладязь лувонь коряс важодемась максы эрявикс питне. Тонавтницятне аволь весть лиснесть изницякс яволявтозь шкинемань тевень пелькстамосонть «Искусство слова», литературань олимпиадатнесэ «Шкинемань секциясонть» кода эсенек буень, истя жо республикань. Те иестэнть республикасо ютавтозь пелькстамосонть «Одарённые дети Мордовии» «Литературный салон «Глаголом жечь сердца людей!»» номинациясонть минек школань тонавтницясь саизе колмоце тарканть, «Ступени» од сёрмадыцятнень пусмонтень совасть минек школань колмо тонавтницятнень стихотворенияст, ёвксост, басняст. Покш лезэ максыть сёрмадейтнень марто вастовоматне. Тонавтницятнень марто ульнинек истямо вастовомасо О. Антиповань ды Н. Понетайкинэнь марто, конатне ютавтозельть Отяжбуень музейсэ. Эрьва сёрмадеенть шкинеманзо тонавтнемстэ ламось ашти тонавтыцянть эйстэ. Седеяк покш питне канды се валось, кона ёвтазь эсензэ азоронзо вельде, конась канды покш вий, арсема ды конась седе виевстэ, видестэ ды валдосто пачти арсеманть кунсолыцятненень.
Тонавтомасонть вакска а юты исследованиянь ёнкс марто важодемаськак. Эйкакштне сёрмадсть истят важодемат: «Косто саевсть веленть перька лисьмапрятнень лемест», «Кулясбуень фольклорось — раськень шкинемань пелькс», «Тиринь ёнксонть содавикс ломанензэ», «Кулязбуень лирик, юморист, сатирик», «Отяжбуень ёроков ломантне». Эсест маштомачист тевс нолдыть и презентациятнень теемстэяк. Тонавтницятне мелень путозь важодсть Интернет - пелькстамотнесэ эрьва кодамо темань коряс, дистанционной олимпиадатнесэ. Моротне ломаненть эрямосо саить а вишкине тарка. Эрьва ие Отяжбуе куншкакуронь сцена лангсо ютавтови морамонь пелькстамо «Эряк, раськень ойме!» («Живи, народная душа»!). Гайгить тесэ кода ськамонь морыцятнень, истя фольклоронь вейсэндявкстнэнь морост, нурька морост. Тонавтницянок зярдояк эзть сакшно шнамонь конёвтомо, казневтеме, сюконямонь валтомо.
Неень шкане весе ютавтозь покш тевтне раськетнень эрикс улемаст кувалма тешкстыть: вишка раськень койтнень – кирдатнень ванстома, вельмевтема, сы шкань эрямов ютавтома. Тезэнь кандовить: келесь, литературась, морамонь – киштемань, озкснонь койтне, оршамопелень анокстамось, чувтосто керсемась, налксемась. Лиякс меремс, эрьва раськень весе мазычись, оймень таштавксось. Миненек эряви свал явомс мель тонавтницятнень содамочист кастомантень, келейгавтомс эрямонть лангс вановтост, седе сэрейстэ кепедемс мелест эсь келенть, литературанть вечкеме, лия раськетнень эрямопингест тонавтнеме.
Монь покштояк покш мелем, штобу эрьва раськесь эряволь, кепетевель – касоволь эсь лувонзо коряс, кадык эрьвась путсы кедьчельксэнзэ эсь раськень мазычинь, сюпавчинь таштавксонть ламолгавтомантень, конась кадови малавиксэнзэ ды весе ломантнень туртов. Сестэ эрямоськак ули эрязь а стяко.
Сюкпря весеменень кунсоломанть кисэ. Шумбрачи тенк, уцяска, од изнявкст важодема таркасонк.