Мои методические находки. Сигимова Н. Г.
Ломанесь ды шкась. Неть кавто валтнэ кеместэ сюлмазь эсь ютковаст. А стяко кортыть: ве таркасо иетне а аштить. Икелев молемаст пингстэ лиякстомтовить оштнэнь ды велетнень чачост, ломаненть тевензэяк – арсеманзояк полавтневить. Модамасторонть лангсо эрямось лажны виев чадыведекс. Сонзэ эйс човорявсть полавтовомат вадрят и берянть. Неть полавтовкстнэнь азорось ломанесь, сонзэ вановтонзо эрямонть ды ютазенть лангс. Мезе сон сайсь лезэвенть ютазь пингестэнть ды кандсы седе тов эрямонзо перть?
Бути Пазонть кармавтоманзо коряс мерезь чачомс масторлангонтень, эряви улемс свал ломанекс, кадомс эсь мельгат паро челькс лиятнень седейсэ, мельсэ – превсэ. Эрьва ломаненть эсензэ мелявксонзо. Вандынь чинтень сон семс кеми, зярс мештеванзо кеняркст валновить. Ды косто неть кеняркстнэнь сайсыть — менельстэ сынь а пракшныть! Ламось ашти эсензэ ломаненть бажамотнень, арсематнень, тевензэ эйстэ. Эдь улить ломанть, конат печтить пинге, сынсь ве паро ледстнемаяк эсь прядост а кадыть.
Эрьвась эйстэнек ськамочинь килангс стямсто арсезеви кевкстеманть лангсо, конась ары икелензэ: кикс улемс? кодамо важодемань тев кочкамс, штобу улевель мелеть коряс, штобу кандоволь кеняркс эстеть ды лезэ лиянень? Монень кувать те кевкстеманть лангсо майсемс эзь саво. Эдь эрси истя: эйкакшпингень бажамотне топавтовить. Мон тонавтнян тонавтыцякс се шкастонть саезь, зярдо эйкакшпингень мелесь парсте топавтовсь 1981-це иестэ. Мон Н.П.Огарёвонь лемсэ университетэнь, тиринь келень ды литературань факультетэнь тонавтниця. Неень шкане ламот эрзятнень ды мокшотнень ютксто ловить пряст рузокс. Мон ломанесь сюпаван, секс што тиринь келень кавто: рузонь – тетянь, эрзянь – авань. Монь свал ульнесь покш бажамом тонавтнемс эрзянь келенть. Хоть ульнесь стака, ялатеке тонавтния, ды сон кармась монень седе малавиксэкс. Эрьва тонавтнемань чистэнть бажинь саемс весе, мезесь маштови важодемасон. Прядыя тонавтнемам 1986 иестэ. Колоньгемень вейке ие важодян эрзянь келень ды тиринь литературань тонавтыцякс эсь тиринь велень тонавтнема кудосо.
Шкась ливтязь ливти. Стувтови весе берянесь ды кежесь, но кады ламо пингень перть сень, мезесь ловови питнеекс, мезенть свал эряви кирдемс эрямолувсонть: чачома ёнксонтеь, тиринь масторонтень вечкемась, лия раськетнень марто ояксчисэ эрямось, вейке вейкенень лездамось, вейкень – вейкень чарькодемась, раськенть ванстомась, кода башка этносонь вейсэндявкс, сонзэ коензэ – кирданзо, тиринь келензэ. Эдь эрьва раськенть тиринь келезэ – питневтеме казне, покш сюпавчи.
Монь икеле сехте покш путовксось: ванстомс эсь тиринь келемек, а сонзэ марто весе пингень перть таштазенть. Эряви тонавтомс эйкакштнэнь тиринь келенть валонь сюпавчинзэ, гайтевчинзэ ды мазычинзэ нееме, эсест арсемаст ёвтамо ды сёрмадомо эрзякс. Эряви невтемс эйкакштненень тиринь келенть питнензэ весе раськенть ды эрьва ломаненть эрямосо. А максомс мадстемс вечкемань штатолонть эрзянь ды мокшонь раськень ломантнень оймесэ тириньсентень. Васняяк, эйдень. Эсь важодемасон покш мель яван тонавтницятнень кель-валост, кортамонь культураст касомасо – сюпалгавтомасо тевентень. Бажан невтемс валонть виензэ, питнейчинзэ. Монь уроктнесэ аштить эрзянь ды лия кудораськень эйкакшт. Секс сави тень максомс эрявикс содамочить келень ды коень – кирдань коряс эрьвантень. Арсемс уроконть смустензэ истя, штобу кемекстамс, домкалгавтомс эрзянь эйкакштнень содамочист таштазь ушодкс класстнэстэ саезь ды штобу остаткатнеяк пряст иляст маря тошначисэ. Уроконть сави арсемс истя, штобу сынь авольть моле ве ёнов, а седе полавтомс, совавтомс истят ёнкст, мезесь кармавты седе ламо содамо одонть, кармавты явомо мель путовкстнэнь топавтомо. Улить зярыя урокт, конатнень арсинь монсь: аволь классо ловномань урок «Пертьпельксэнь мазычинть ванстомадо мельтне — превтне И. А. Калинкинэнь « Пиче вирь » стихсэ повестьсэнть», «П.С.Кирилловонь «Литова» драмась эрямопингесэ ды искусствасо», кемекстамонь урок «Существительноесь – келенть юрозо», кель-валонь кастомань урок «Минек буень содавикс ломанть» ды лият.
Эсь важодемасон уроктнеде башка, ламо мель яван урокто мейлень ютавтома шкантень. Аволь вейке ие ветян «Сяткинеть » вейсэндявксонть, козонь совить сеть эйкакштне, конатнень ули ёрокчист сёрмадомань тевсэнть. Бажан эрявиксстэ, маштозь ладямс лувонь коряс важодеманть, мезесь максы эрявикс питне. Тонавтницятне аволь весть лиснесть изницякс яволявтозь шкинемань тевень пелькстамосонть «Искусство слова», эрзянь келень ды тиринь литературань коряс пелькстамотнесэ. Покш лезэ максыть сёрмадейтнень марто вастовоматне. Тонавтницятнень марто ульнинек истямо вастовомасо О. Антиповань ды Н. Понетайкинэнь марто, конатне ютавтозельть Отяжбуень музейсэ. Кенярдовты се, што аволь весть ульнесть инжекс минек велень сёрмадеесь П.А.Ключагин ды Р.Д.Жегалина, кона эсь важодеманзо уставизе минек тонавтнема кудосонть. А кадан ве ёнов исследованиянь ёнкс марто важодеманть. Неень шкане те налкси покш зэме тонавтницятнень содамочист касомасо. Эйкакштне сёрмадыть истят важодемат: «Кулязбуе веленть топонимиказо», « Кулязбуе велень фольклоронь жанратне», «Тиринь веленть эрямопингезэ», «Свадьбась икеле ды ней», «Отяжбуень ёроков ломантне», «Эрзянь ды мокшонь раськенть неень шкань коензэ — кирданзо»… Сынст топавтомга эрьвась вешни эрявикс материал, ветить кортамот сыре ломантнень марто. Улить важодемат, конатнень топавтыть зярыя эйкакшт. Те седеяк парсте лезды невтемс эрьва эйкакшонть колчинзэ. Се шкане эрьвась мари прянзо прок алкуксонь ванныцякс – тонавтыцякс. Зярдо эрьвась сонсь топавты тевенть, лезэсь седе покш. Те кармавты эсь вийсэ содамочитнень ламолгавтомо. Истят тевтнень топавтомсто тонавтыцянть зэмезэ лиякстоми: сон карми улеме те тевентень ветицякс, пурныцякс, превень максыцякс, ёвты шканть, зярдонень эряви топавтомс Мейле кочказь, витнезь важодемась тевс нолдави урокстояк, идеви, кучови эрявикс шкинемань пелькстамос. Аволь ансяк уроксто бажан тевс нолдамо авейкеть ветямонь кедьёнкст, мезесь лезды кастомс тонавтницятнень содамочист, кармавты сынст паро мельсэ кунсоломо, кепеди мельчист. Од изнявкстнэ техникасонть, нама, те пек паро тевесь, бути сынст нолдамс тевс тонавтнемстэ колсто, маштозь, лезэ марто. Компьютерэть лезэзэ покш. Презентациянь невтемстэ касы эйкакштнэнь мелест эстест анокстамс важодема эрявикс темань коряс. Эсест маштомачист тевс нолдыть проектнэнь анокстамосо. Моротне ломаненть эрямосо саить а вишкине тарка. Эрьва ие Отяжбуе куншкакуронь сцена лангсо ютавтови морамонь пелькстамо «Эряк, раськень ойме!» («Живи, народная душа»!). Гайгить тесэ кода ськамонь морыцятнень, истя фольклоронь вейсэндявкстнэнь морост, нурька морост. Тонавтницян зярдояк эзть сакшно шнамонь конёвтомо, казневтеме, сюконямонь валтомо.
Покшчикс эрьва ие тонавтнема кудотнесэ эрси чадыковонь 16 – це чись – Эрзянь келень чи!.. Те эрьгедемантень анокстатано зярыя чиде икелев. Ютавтневить кортамот, моравить морот, пелькстамот, налксемат.
Путовкстнэ, конатне путозь монь ды весе тонавтыцятнень икеле, покшт ды а шождынеть. Сынь вадрясто топавтовить ансяк сестэ, зярдо тонавтыцясь сонсь вети тевензэ мелень путозь, весеме ёндо домкалгавты ды келейгавты эсь анокчинзэ, зярдо сон вечксынзе эйкакштнэнь, эсь тевензэ, свал вешни од кить — янт тонавтома лувонть седе тов паролгавтомга. Эсь ёрокчим невтемга панжонь урокт максан кода эсь тонавтнема кудосо, истя жо, Отяжбуень тонавтыцятнень туртов семинаронь ютавтомсто, вачнан виень тонавтыцянь пелькстамотнесэ, яксян научно – практической конференциява. Астяко кортыть, што тонавтыцясь сонськак тонавтни, вешни, пурны содамочить, зярс важоди эйкакштнэнь марто.
Монень свал эряви явомс мель тонавтницятнень содамочист кастомантень, келейгавтомс эрямонть лангс вановтост, седе сэрейстэ кепедемс мелест эсь келенть, литературанть вечкеме, лия раськетнень эрямопингест тонавтнеме.
Шкась – сехте паро онкс сенень, мезе тейсь эрьва эриесь. Мон а янксян сень кувалма, мекс эрямом сюлмия тонавтома тевенть марто. Седе товгак карман бажамо эсь раськень мазычинь, сюпавчинь таштавксонть ламолгавтомантень, конась кадови малавиксэнь ды весе ломантнень туртов